Read in English

L-‘Internet’ sar għodda li toffri diversi benefiċċji lis-soċjeta’ tagħna: inaqqas id-distanza ġeoġrafika filwaqt li jiffaċilita’ il-komunikazzjoni bejnietna, joffri aċċess għal riżorsi edukattivi kemm għat-tfal kif ukoll għall-kbar.  Jista’ wkoll jintuża bħala mezz ta’ referenza jew parir.  Kullħadd jista’ jippublika xi informazzjoni fuq l-‘Internet’ bħal ma kullħadd jista’ jkollu aċċess għal dan il-materjal, anki tfal.  Dan ma jfissirx li kulma nsibu fuq l-‘Internet’ huwa korrett jew tajjeb għat-tfal tagħna.  Il-fatt li huwa faċli biex jintuża mit-tfal, iwassal għal periklu li tfal jistgħu jaraw informazzjoni offensiva jew mhix adattata għal eta’ tagħhom.  Adulti b’intenzjonijiet mhux tajba jistgħu jużaw dan il-mezz faċilment biex jabbużaw minn minorenni billi joħolqu identita’ falza.

Il-‘Hotline’ għal abbuż ta’ tfal permezz tal-Internet jaħdem ukoll biex inaqqas dawn ir-riskji li tfal jiltaqgħu magħhom fuq l-Internet. Il-‘hotline’ joffri ambjent sigur fejn il-pubbliku ġenerali jista’ b’mod kunfidenzjali, jagħmel rapport dwar dawn:

(i) Stampi li jinvolvu tfal f’sitwazzjonijiet sesswalment espliċiti.
Teżisti varjeta’ vasta ta’ dawn it-tip ta’ stampi fuq l-‘Internet’¹ u mhux kollha huma perikolużi indaqs.Il-liġi Maltija dejjem tipproteġi lill-minuri.

(ii) Kuntatt minn adulti fuq tfal li jsir permezz ta’ chatting fuq l-Internet.
Adult b’intenzjoni malizzjuza jista’ juża ‘chat room’ biex jiġbor informazzjoni, iqassam materjal pornografiku u/jew jipprova jiċċetja ma’tfal bl-intenzjoni li jħajjar lit-tfal għal-attivita’ sesswali bħal pereżempju isaqsi lil tifel/tifla biex tinża quddiem ‘webcamera’. Dan jista’ jwassal biex dan l-adult ikun irid jiltaqa’ fiżikament ma’ tfal billi jiftiehem x’imkien magħhom.

¹ L-għan tagħna mhuwiex li nwaqqfu ‘websites’ pornografiċi intenzjonati għall-adulti iżda li nedukaw lit-tfal kif ukoll ġenituri tagħhom, dwar il-perikli li jistgħu jiltaqgħu magħhom fuq l-‘Internet’, u kif jevitaw li jiġrilhom dan.